کسی کو اپنے عمل کا حساب کیا دیتے
سوال سارے غلط تھے ، جواب کیا دیتے
خراب صدیوں کی بے خوابیاں تھیں آنکھوں میں
اب اِن بے انت خلاؤں میں خواب کیا دیتے
ہوا کی طرح مسافر تھے دِلبروں کے دل
اُنھیں بس ـــ اِک ہی گھر کا عذاب کیا دیتے
شراب دل کی طلب تھی شرع کے پہرے میں
ہم اتنی تنگی میں ـــ اس کو شراب کیا دیتے
مُنیرؔ ــــــ دشت شروع سے سراب آسا تھا
اس آئینے کو ـــ تمنا کی آب کیا دیتے
*****
*****
شاعر : مُنیر نیــازی
مجموعہ کلام : ”چھہ رنگیں دروازے“
